Mikilvægi vandaðrar og þverfaglegrar nálgunar í barnavernd var í forgrunni á málþingi um frumvarp til nýrra barnaverndarlaga undir yfirskriftinni Barnavernd – fyrr og nú, sem haldið var í Háskóla Íslands 6. maí s.l. Þar komu saman sérfræðingar úr stjórnsýslu, fræðasamfélagi og fagstéttum til að ræða fyrirliggjandi frumvarp til nýrra barnaverndarlaga og áhrif þess á réttindi barna og framkvæmd barnaverndar í landinu.
Málþingið var samstarfsverkefni Félagsráðgjafadeildar og Lagadeildar Háskóla Íslands, sem undirstrikar mikilvægi þess að samtal fari fram milli fag- og fræðigreina þegar móta á lög og stefnu á jafn viðkvæmu sviði og barnavernd. Markmið fundarins var að skapa vettvang fyrir faglega og gagnrýna umræðu um frumvarpið með sérstaka áherslu á áhrif þess á réttindi barna, samstarf ólíkra þjónustukerfa og innleiðingu nýrra laga.
Í erindi sínu varpaði Anna Tryggvadóttir, skrifstofustjóri í Mennta- og barnamálaráðuneytinu, ljósi á markmið frumvarpsins og helstu nýmæli þess en áætlanir gera ráð fyrir að ný lög taki gildi um næstu áramót. Þyrí Halla Steingrímsdóttir, starfandi framkvæmdastjóri hjá Barnavernd Reykjavíkur, fjallaði um áskoranir og tækifæri í daglegu starfi barnaverndar og hvernig lagabreytingarnar geti haft áhrif á þjónustu sveitarfélaga og Steinunn Bergmann, formaður Félagsráðgjafafélags Íslands, ræddi um faglegt starf og hlutverk félagsráðgjafa og starfsskilyrði þeirra í ljósi fyrirhugaðra breytinga.
Í umræðum komu fram áherslur um að mikilvægt væri að tryggja skýrleika í lögunum, sérstaklega þar sem þau móta ramma, bæði um réttindi barna og um faglegt starf þeirra sem starfa að barnavernd. Þá var áhersla lögð á að árangur í málaflokknum ráðist ekki aðeins af lagasetningu, heldur einnig af samvinnu milli stofnana, foreldra og fagaðila samhliða aðgengi að úrræðum.
Fundinum stýrði Hrefna Friðriksdóttir, prófessor við Lagadeild Háskóla Íslands og var þátttaka góð, bæði á staðnum og í streymi.
(frétt af vef HÍ )
