Pop-up fundur með frambjóðendum í Reykjavík sem fengu skýr skilaboð um stöðu velferðarþjónustu.
Fimm fag- og stéttarfélög á heilbrigðis- og velferðarsviði innan BHM, stóðu nýverið fyrir pop-up fundi með fulltrúum framboða í Reykjavík þar sem rætt var um stöðu velferðarþjónustu og helstu áskoranir sem hún stendur frammi fyrir.
Markmið fundarins var að færa frambjóðendum skýr skilaboð frá fagfólki sem starfar daglega í framlínu velferðarþjónustunnar.
Alls mættu fulltrúar átta framboða sem samkvæmt nýjustu skoðanakönnunum mælast með nægt fylgi til að ná kjöri í borgarstjórn.
Kerfin tala ekki saman
Á fundinum var lögð áhersla á að fagfólk hafi ítrekað bent á tvö meginvandamál: undirmönnun og skort á samþættingu kerfa. Takmarkað upplýsingaflæði, ósamhæfð tölvukerfi og að veikburða stafrænir innviðir torveldi samvinnu milli þjónustukerfa. Þetta bitnar á þjónustu við börn, eldra fólk, fatlað fólk, flóttafólk og notendur félagsþjónustu almennt.
Jafnframt var bent á að málafjöldi sé víða of mikill, faghandleiðsla ófullnægjandi og skriffinnska taki dýrmætan tíma frá faglegri vinnu með fólki.
Áhyggjur af öryggi starfsfólks
Nýlegar kannanir meðal félagsráðgjafa og þroskaþjálfa sýna að allt að 94% hafa orðið fyrir hótunum eða ofbeldi í starfi og 55% á síðustu tólf mánuðum. Að mati félaganna er hætta á að streita, kulnun, starfsmannavelta og lakari þjónusta verði viðvarandi ef ekki verður gripið til markvissra aðgerða.
Lögð var áhersla á að vandinn sé kerfislægur en ekki einstaklingsbundinn.
Barnavernd og farsæld barna
Varðandi barnavernd kom fram að álag fari vaxandi og víða reynist erfitt að standa við lögbundna tímafresti og nauðsynlega eftirfylgd mála. Félögin bentu á að ef tryggja eigi farsæld barna þurfi fleiri fagstéttir inn í skólakerfið, meðal annars félagsráðgjafa, iðjuþjálfa, þroskaþjálfa og sálfræðinga.
Eldra fólk þarf sterkari nærþjónustu
Í málefnum eldra fólks var lögð áhersla á forvarnir, endurhæfingu og aðgengilega þjónustu í nærumhverfi. Ef markmiðið sé að fólk búi sem lengst heima þurfi öflugri stuðning, meðal annars með aukinni aðkomu heilsugæslu og þverfaglegra teyma.
Jafnframt var bent á að félagsleg einangrun, einmanaleiki og geðrænn vandi séu útbreidd áskorun hjá þessum hópi og mikilvægt sé að tryggja tækifæri til virkni, þátttöku og aðgengis að sérfræðiþjónustu.
Mikill samhljómur á fundinum
Að sögn skipuleggjenda tókst fundurinn afar vel. Frambjóðendur tóku vel í þær áherslur sem lagðar voru fram og ríkti víða samhljómur um mikilvægi öflugrar velferðarþjónustu og góðs vinnuumhverfis starfsfólks.
Skilaboðin voru skýr: Til þess að íslenskt velferðarkerfi standi undir lögum og gildum samfélagsins þarf raunverulega pólitíska skuldbindingu, nægt fjármagn og fagmennska að vera í fyrirrúmi.
Frá Samfylkingunni mættu Regína Ásvaldsdóttir og Pétur Marteinsson. Frá Vinstri grænum/ Vinstrinu mættu Stefán Pálsson og Ásta Dís Skjalddal. Alexandra Briem var fulltrúi Píröta. Frá Flokki fólksins mættu þeir Guðmundur Ingi Þóroddsson og Einar Sveinbjörn Guðmundsson. Magnea Gná Jóhannsdóttir og Þorvaldur Daníelsson voru fulltrúar Framsóknarflokksins.Kristín Kolbrún Kolbeinsdóttir Waage var fulltrúi Miðflokksins og frá Viðreisn mætti Róbert Ragnarsson. Loks var Ragnhildur Alda Vilhjálmsdóttir fulltrúi Sjálfstæðisflokksins.
Félögin fimm sem stóðu að skipulagi og undirbúningi voru Félagsráðgjafafélag Íslands, Iðjuþjálfafélag Íslands, Sálfræðingafélag Íslands, Félag sjúkraþjálfara og Þorskaþjálfafélag Íslands. Skipuleggjendur vilja koma á framfæri þökkum til frambjóðendanna fyrir góðar, mikilvægar og málefnalegar umræður.
