Ályktun frá stjórn Félagsráðgjafafélags Íslands varðandi innheimtu legugjalds á sjúkrahúsum

skrifað 10. okt 2013

Stjórn Félagsráðgjafafélags Íslands sendi rétt í þessu frá sér eftirfarandi ályktun frá varðandi fyrirhugaða innheimtu á legugjöldum:

Stjórn Félagsráðgjafafélags Íslands harmar ákvörðun ríkisstjórnarinnar að setja eigi sérstakt legugjald á sjúklinga sem dvelja á sjúkrahúsi. Í fjölmiðlum síðastliðna daga hefur komið fram að útlit sé fyrir að ákveðnir hópar muni ekki þurfa að greiða fullt legugjald. Engu að síður er vakin athygli á því að fólk er alla jafna ekki í þeirri stöðu að geta afþakkað innlagnir og oft er um að ræða bráðaveikindi sem ekki fara í manngreiningarálit. Sjúkrahúsdvöl veldur alltaf auknu álagi á einstakling og fjölskyldu hans og geta áhyggjur af lengd dvalar vegna aukinna útgjalda orðið til þess að trufla bataferlið.

Stjórn Félagsráðgjafafélag Íslands hvetur stjórnvöld til að draga til baka ákvörðun um legugjöld á sjúklinga og varar við þessari fyrirhuguðu gjaldtöku, sem er til þess fallin að mismuna fólki og auka álag á fjölskyldur sjúklinga.

Fyrir hönd stjórnar Félagsráðgjafafélags Íslands, María Rúnarsdóttir, formaður Sími: 595 5151/699 5111 Netfang: maria@felagsradgjof.is / felagsradgjof@felagsradgjof.is